Firəngiz Əlizadə

Festivalın bədii rəhbəri,
Azərbaycan Bəstəkarlar İttifaqının sədri,
UNESCO-nun Sülh artisti

Bu il bizim Festivalımız öz ilk yubileyini – beş illiyini qeyd edir. Uğurla keçirdiyimiz IV “İpək yolu” festivalından sonrakı bu bir il hiss olunmadan ötdü və biz yenidən V “İpək yolu” Festivalının dinamik,parlaq hadisələrlə zəngin mühitində yaşayacağımız maraqlı məqamları ruh yüksəkliyi ilə gözləyirik.

Keçən il Qara Qarayevin “Yeddi gözəl” baletinin açıq havada nümayişinin şəkililərin və qonaqların qəlbində yaratdığı heyranlıq hisslərindən ilhamlanaraq, biz bu dəfə festivalı yeni bir tamaşa – Azərbaycan musiqisinin şedevri olan Niyazinin “Rast” simfonik muğamı əsasında səhnələşdirilmiş balet tamaşası ilə açırıq. Simfonik orkestrin səslənməsi festivalın başlanğıcı və finalı arasında özünəməxsus körpü rolunu oynayır. İlk dəfə bizim festivalın qonaqları olan Rusiyanın məşhur kollektivi – Sankt-Peterburqdan “Ermitaj” simfonik orkestri klassik musiqi əsərlərinin parlaq ifası ilə dinləyicilərə şövq verəcək.

Həmçinin, V festivalın daha bir yeniliyi Bakı Marionet Teatrının “Arşın mal alan” tamaşasının nümayişi ilə bağlıdır. Üzeyir Hacıbəylinin bu ən məşhur əsərinin qeyri-adi təfsiri festivalın proqramına özünəməxsus məlahət aşılayacaq. Unikallığı ilə seçilən Qədim Musiqi Alətləri Ansamblı isə Xan Sarayının koloritli fonunda ecazkar ifaları da şəkililərin və festivalın qonaqlarının ruhunu oxşayacaq. Azərbaycan dinləyicilərinin sevimlisi olan “EUROVISION” Mahnı Müsabiqəsinin qalilblərinin və iştirakçılarının gənclik təravətli,müasir ritmli çıxışları böyük sürpriz olacaq və festivalın palitrasını yeni çalarlarla zənginləşdirəcək.

“İpək yolu”nun marşrutu bu dəfə Hindistan və Çin kimi ekzotik ölkələrdən keçəcək. Bu ölkələrin ən tanınmış kollektivləri festivalda ənənəvi musiqidən ibarət rəngarəng proqramla çıxış edəcəklər. Biz Azərbaycanın Hindistandakı və Çindəki Səfirliklərinə bu kollektivlərin Şəkiyə dəvət olunmasına fəal surətdə yardım etdiklərinə görə öz minnətdarlığımızı bildirmək istərdik.

Ulu öndərimiz Heydər Əliyev daim vurğulayırdı ki, türk xalqları “min illər boyu sıx əməkdaşlıq etmiş, qarşılıqlı fəaliyyət göstərmiş, bir-birini zənginləşdirmişlər”. Son illərdə isə bu birlik və qardaşlıq daha böyük vüsət kəsb etmişdir. Bu baxımdan TÜRKSOY Beynəlxalq Türk Mədəniyyət Təşkilatı tərəfindən təqdim olunan türkdilli ölkələrin milli geyimləri və musiqisindən ibarət “Defile” bizim bayramımızın ən yaddaqalan hadisələrindən biri olacaq.

Həmişə olduğu kimi, biz qardaş Türkiyənin bədii kollektivləri ilə görüşləri səbirsizliklə gözləyirik. Bu dəfə İstanbuldan məşhur bir ansambl – Modern Folk Müzik Topluluğu maraqlı konsert proqramı ilə bizi sevindirəcək. Belə dəyərli qonaqlarla ünsiyyət imkanı yaratdığına görə biz Türkiyə Cümhuriyyətinin Mədəniyyət Nazirliyinə və bu ölkənin Azərbaycandakı Səfirliyinə minnətdarıq.

Tarixən “Böyük İpək yolu” Azərbaycanın, ümumiyyətlə, bütün Avropa və Asiya ölkələrinin iqtisadi, siyasi və mədəni inkişaf tarixində silinməz izlər qoymuş və Şəki bu yolun önəmli bir məkanı kimi məşhurlaşmışdır. Azərbaycan Prezidenti möhtərəm cənab İlham Əliyev Şəkinin bu mövqeyini dəyərləndirərək, burada beynəlxalq musiqi festivallarının, muğam müsabiqələrinin, mədəniyyətlərarası dialoq forumlarının keçirilməsini tövsiyə etmişdir. Şəki haqqında bu cür qiymətli sözlər festivalın bütün iştirakçıları, qonaqları və təşkilatçıları üçün gözəl xeyir-dua olub, bizim tədbirimizin müvəffəqiyyətinin rəhnidir.